جريدة صيدونيانيوز.نت / خليل المتبولي : تشويش رقم 9 – الكلام بسرّي !
جريدة صيدونيانيوز.نت / اخبار مدينة صيدا / خليل المتبولي : تشويش رقم 9 – الكلام بسرّي !
بقلم : خليل إبراهيم المتبولي
- شو جايي يعمل معاليه ؟
• معاليه ما بينسأل
- أنا ما عم بسأل معاليه ؟! عم بسألك ألك
• شو بدّك تعرف ؟ جايي يطل على ولاد رعيتو
- ليش صار خوري ؟
• بلا مسخرة ، إذا واحد عم يطل على ولاد رعيتو وعم يسمع مشاكلهم ويوقف معهم بكون خوري ؟!
- يوقف معهم ، أيوا ، هون الموضوع ، كرمال شو بدو يوقف معهم ؟
• الكلام بسّرك
- الكلام بسرّي ؟! بس ما بدّي ياه يكون بسرّي ...
• ماشي ، جايي كرمال يدعم مشروع سد ...
- سد بوزك وما تكمل ، هيدا المشروع بوصّل لتدمير مرج وتهجير قرى مجاورة ...
• شو هالحكي ؟ هيدا كلّو إفتراءات و إدّعاءات تدميرية .. مش مقبولة ... وانعمل دراسات .
- كل هالدراسات انعملت لمصالح معينة ، وإستفادة ، وبعيدة عن المنطق والعقل ، لأنّو إذا تحقق هالسد رح يسبب ضرر كبير على ولاد رعيتو يا حبيبي ، ورح يكون متل شي لغم ما بتعرف إيمتى بيفجر ...
• طول بالك ، عن جد هيك ؟!
- إيه طبعًا ، كارثة كبيرة رح يصير بهالمرج
• طيب شو الحل ؟ شو مفروض يصير ؟
- مفروض معاليه ، يوقف بوجه هالمشروع ، ويطالب أنو هالمرج يصير محمية طبيعية ، أنت شايف أمّا منطقة ، وأما مرج ، وأما هوا نضيف فيه ؟ إذا صار محمية طبيعية مش أحسن ؟
• إيه طبعًا أحسن ، وأفضل بكتير من هيداك المشروع ...
- شفت كييف ؟ إيه هلأ صار الكلام بسرّي .