الرئيسية / أخبار صيدا /مقالات /خليل المتبولي : تشويش : ما رح تمرق ... السيارة !

جريدة صيدونيانيوز.نت / خليل المتبولي : تشويش : ما رح تمرق ... السيارة !

 

Sidonianews.net

---------------

 

بقلم : خليل ابراهيم المتبولي

 

-           شوباك وقفت ؟

•           إنتَ شو باك ؟ هاي طريقي

-           لأ ، هاي طريقي أنا ، وزيح من طريقي خلّيني كمّل ...

•           لأ، ما حزرت ، الطريق طريقي ، وأنا يللي بدّي مر .

-           هيأتك مُرْ زيادة عن اللزوم ، ومّرْمَرْ عيشتنا .

•           صرت أنا يللّي مّرْمَرْ العيشة ، شوف حبيبي أنا ما رح إرجع ، وباقي بمكاني ، لأنّو هيدا حقي .

-           وحقي كمان ، والأرض يللي واقف عليها هاي أرضي .

•           وأرضي كمان ، مش من حقك تدّعي وتخلق أعذار ، هيدي الأرض للجميع .

-           الأرض للجميع ، وأنا قبلك هون عليها ...

•           لأ ، أنا قبلك ، ووصلت قبلك .

-           شو هوي يللي بيوصل قبل ؟!؟ هوي يللّي حضورو وكيانو قبل . سماع من الآخر مَرْقا ما رح تمرق .

•           بدّي أمرق .

-           ما رح تمرق ، أو بكسرلك سيارتك .

•           استرجي قرّب ع سيارتي .

-           ليك ، ما تهدّد .

•           ما عم هدّد ، بس بدّي دافع عن سيارتي .

-           حقّك تدافع عنها وتحميها كمان ، بس ما رح تمرق .

•           في كرامتي قدّام الناس ، وكرامة سيارتي  .

-           كرامتك ع راسنا ، وكرمال كرامة سيارتك ، ودفاعًا عنها مش رح تمرق .

•           بدّي أمرق ، وما تاخدني بالعواطف .

-           بدي ذَكْرَك إذا كنت ناسي ، أنّو أنتَ يللي خرّب بوجياتها كرمال تعطّلها وتبطّل تشتغل .

•           لأ حبيبي مش أنا ، إذا بتذكر أنتَ خربتلي الكاربيراتور بالأوّل .

-           وأنتَ يللّي نَفّست دواليبك حتى ما تقدر تمشي .

•           هلأ من الآخر ، بدّي أمرق .

-           ما رح تمرق ، ورجاع لورا .

•           ما عدت قادر إرجع ، ورايي سيارات وناس .

-           وأنا كمان ورايي سيارات وناس .

•           والحل ؟

-           بإيدك .

•           لأ ، بإيدك أنتَ ...

( لا زال الإختلاف والخلاف قائمًا ، وما رح تمرق عالقة بين الإثنين معًا )

----------------

جريدة صيدونيانيوز.نت / اخبار لبنان / خليل المتبولي : تشويش : ما رح تمرق ... السيارة !

2022-01-04

دلالات: