جريدة صيدونيانيوز.نت / خليل المتبولي : راس ، السنة !..

جريدة صيدونيانيوز.نت / اخبار مدينة صيدا / خليل المتبولي : راس ، السنة !..

بقلم : خليل إبراهيم المتبولي

شو يعني راس السنة ؟ وليش راس ؟ أنّو ما فيها تكون رقبة السنة أو عين السنة أو منخار السنة أو ذنب السنة ؟ ما عم بفهم شو هالمصطلح هيدا ؟ كتيرة هيي المصطلحات يللي بتخليك توقف عندها وتفكّر فيها ، يمكن راس ؟! أد ما بتكون أيام هالسنة حاملة من هموم وأوجاع ومشاكل وأفراح ( يلا أحسن حدا يقول ما ذكرنا الفرح ) ، وأحزان ، وطلعات ونزلات ... وإذا اعتبرنا جمع الأيام بتعطينا أشهر ، وجمع الأشهر بتعطينا سنة ، متل الإنسان يللي ببلش زغير وبيكبر وبيتطّور وبيحمل براسو كل خزعبلات الحياة ، فالسنة هيك ، يمكن لهالسبب قالوا راس .. كمان يمكن لأنّو الإنسان بِطُلْ على هالحياة من راسو ، وبتكون البداية ،  فإذًا كلمة راس هي الأهم ... بقلولك بشوفك ع راس السنة ، وين بأي منطقة من هالراس ؟ شمالي جنوبي ، شرق غرب ، داخلي خارجي ؟ وين بالظبط ؟..

 أو شووو ؟!  منشكّل حكومة قبل راس السنة ، وين قبل عالرقبة مثلًا ؟ لأ ، وما بتظبط معن ، بقلولك ماشي بأول سنة الجديدة ، أنّو شو يعني ؟ أو بكونوا عم براهنوا من هلأ لراس السنة بتخلص ، تخلص ؟ إيه لأ حبيبي ، إذا ما ظبطبت خلال السنة ، براسها ما رح تظبط ، بس رح تطلع براسها وراسنا ، لأنو بكون كل شي خرب ، وما بقا ظابط شي ،  بس لأ ، في راس بينرفع في الراس ، هوي راس الشباب الثائر ، المنتفض بالشوارع وعم بطالب بالتغيير ، والوصول لتحقيق المطالب المحقّة ، على أمل التغيير،وتطيّرهالروس الفاسدة ، وينتصر راس الحكمة ، وكل راس سنة وأنتو بألف خير...