الرئيسية / أخبار صيدا /أقلام ومقالات /صيدا حيطها مش واطي... بقلم الأستاذ أحمد شعيب

الأستاذ أحمد شعيب ( صيدونيانيوز.نت )

جريدة صيدونيانيوز.نت / صيدا حيطها مش واطي... بقلم الأستاذ أحمد شعيب

Sidonianews.net

----------

بقلم الأستاذ أحمد شعيب

بعرف في ازمة محروقات على مستوى لبنان، ما بدها فلهوي... بس كمان ما بدها فلهوي ليلاحظ انو حصة صيدا من الأزمة أكبر من غيرها... 
حصة المدينةمن التغذية الكهربائية الرسمية اقل، ومن المازوت أقل، وحتى محطات البنزين خلال الأسبوعين الماضيين ارتاحت بكل لبنان، الا صيدا ضل فيها طوابير (وإن بشكل اخف)، وبعض المحطات بقيت بلا بنزين كم يوم... 
اذا عم بصير هيك كرمال نواب المدينة مش طيبات مع منشآت النفط بالزهراني ومن خلفهم، خبرونا... واذا طيبات لكن بس لدرجة انو يطلعنا حصة ضيعة مع اننا ثالث أكبر مدينة بلبنان، كمان خبرونا لنعرف كيف نتصرف... 
صيدا رئيسة اتحاد بلديات صيدا الزهراني، ومواردها تشكل دعم كبير لميزانية الإتحاد، واذا بدنا نحكي عن النفايات بس (غير الاستشفاء والتوظيف بالمؤسسات الخاصة وحتى القطاع العام الخ الخ)، صيدا عم تستقبل نفايات الإتحاد اضافة لجزين... اذا مدينتنا بس هيك قيمتها بالنسبة للمحيط، وعم يكارمونا مقابيلهم بشوية مازوت، ما بدنا هني خيي، خدو زبالتكم وطفولنا الضو منقعد عالشمعة...  
انا ابدا ما عم بحكي مناطقية، لكن لما شوفك بعينتين، اقله تشوفني بعين وحدة يا خيي مش عم قول باربعة... اما اذا رح تضل المعاملة مش من باب المساواة، واذا نواب المدينة (مع انو مش شغلتهم لكن هيدا الواقع) ما ضمنوا حصة صيدا من التغذية الكهربائية والمحروقات تتسلم للبلدية وتتوزع من خلالها بشكل عادل، ما يضلوا يضحكوا عالناس المعترة يلي بتقصدهم وبتطالبهم وهني بيعطوهم ابر بنج او بربحونا جميلة من كيسنا بالقطارة، يتفضلوا يستقيلوا من مراكزهم او يرفعوا العشرة انو ما طالع بايدهم، خلينا نحنا ساعتها ندبر أمورنا بالتي هي أحسن...
وما_أدراك_ما_التي_أحسن
صيدا_حيطها_مش_واطي

--------

جريدة صيدونيانيوز.نت / صيدا حيطها مش_واطي بقلم الأستاذ أحمد شعيب 

2021-08-09

دلالات: